ராதா4 தொகனவெ நாயகி ஸ்வாமின்

ராதா⁴ தொகனவெ நாயகி ஸ்வாமின்

எழுத்தாளர்: T.S. சரோஜா சுந்தர்ராஜன், கோவை

தூ மது²ராபுரிமு ரி:யெஸ்கி பா³
கோ³குலும் மொய்ரெ ஒயஸு ஜியெஸ்கி பா³
தூ மது³ராக் ஜெயெ பா⁴டாம் ஜூலோ ப⁴ந்தி³
அம்ரெ ஸ்ருங்கா³ர் கே²ளும் ஸௌரஸேனிம் க³வ்லி
ப்ரக்ருதிம் பஸுபக்ஷிம் அகாஸ் நெத்³தி³ம்
கீஷ்டு தொய்ரெ அங்க³லெக்ஷண் ஸீலி ஸீலி
வராம் பொ⁴ரி ரி:யெதொய்ரெ பொ³ங்க்³ஸூ ஜகில்லி
விரக்³டாப் ஸஹன்கெர்லி ஜுலிஸ்கி பா³
தூமது²ரா புரிமு ரி:யஸ்கி பா³
தூமது²ரா புரிமு ரி:யஸ்கி பா³

'ராதா⁴' நமம் க⁴லிகின் ஹவ்ட்⁴யாகி பா³
ப்ரேம் தா³ராகன் தொய்ரெஹோர் கெ³ளீஸ்கி பா³
ஞாந்தே³ன் தொய்ர் ப்ரேவுக் ஜல்னாஸ்தகு
ஞானினும் மேட் ஞானி 'மீஸ் மெனி' மெல்லீஸ்கிபா³
பரமாத்மா தொரெ ஸெரொ ஐக்யம் ஹொனிக்
ஜீவாத்மாமீ க²டெ ஜெலுமுன் ஸங்குஸ்கி பா³

ராதா⁴ க்ருஷ்ணாக் ஜெய் ஜெய்
ராதா⁴ க்ருஷ்ணாக் ஜெய் ஜெய்

ஸௌரஸேனி கவிபுருஷ் ஸூர்தா³ஸ் ஹொய்லி
ஸஸர்லாக்² கவிடான் ராதா⁴ க்ருஷ்ண ஸ்ருங்கா³ர் லீலான்
க³விக³விகின் ஸொம்பு ஹொயெஸ் அந்தர் த்³ருஷ்டிமூ
த்³ருஷ்டுகீன் ஸுர்தாஸுக் லாஜ்நீ: மெந்யாஸி
ஸௌரஸேனி பா⁴ஷாக் இன்பு பொங்க்³ஸூர் கெர்த்யேஸி
கோ³வர்தன் கிரி த⁴வ்ராம் அஷ்டசாபுன் ஸெரொ
க³விநசிது⁴ங்கி வைப⁴வ் ஜிவ்னம் ஜிவேஸி

ஜெய் கோ³வர்தன்கி³ரி ஸ்ரிநாதுக் ஜெய்
ஜெய் கோ³வர்தன்கி³ரி ஸ்ரிநாதுக் ஜெய்

ஸௌரஸேனி சிகுர் பா³ஷா மராட்டி பெ³ய்கன்
மீரா நமம் க⁴ல்லி க்ருஷ்ணபத்னி மெல்லிஸ்
தொரெ ப⁴ஜன் க⁴வ்லேத் வராபோக் ஜியெ ஜீவ்
தமிழ் பா⁴ஷா ஆண்டா⁴ள் கொய்லி பாஸுரம் க³விஸி
பு²லெ பூ²லூனும் தொரெஸ்மிதமுக ஸிங்கா³ர் ஸீலி
பூ²லுமாலெ கெ³ளாம் கல்லி தொக³ க⁴ல்திஸி
ராதா⁴ஸொகன் கோ³பிகானுக் செர்ச்சிலிஸ்கிபா

மார்க³சீர்ஷொ ம:டொ³ போர் புந்நிம் திந்நுமெநொ
மார்க³சீர்ஷொ ம:டொ³ போர் புந்நிம் திந்நுமெநொ

ஸௌரஸேனி சிகுர்பா⁴ஷொ ஸௌராஷ்ட்ர கவிகன்
நடன கோ³பால் தொரெ நாயகி³ ஹொய்யேஸ்
ராதா⁴ஜெலும் ரீ:லி கெரெ மொய்ர்ப⁴க்தி ஸ்ங்கி³ல்லி
தொர் ந்யாவ் மொர்ந்யாவ் ரஜமன்னார்ஜோள் ஸங்கி³தேஸ்
ராதா⁴ஜெலும்மு ரி:யெ ஹங்க்ருதி ஜெயெஹால்
ராஜமன்னார் தொக கெ⁴டி³பொ³வி மொய்ர்ஸெரொ செர்சிதேஸ்
த்⁴யானும்பிஸி 'ஹரி அவ்டி³யோ' மெல்லெத்கன்
ப்ராண்ஸொட³ன் வேள் கெ³ருட்³ வாஹனோ:ர் பொ³ல்ஜியேஸ்

ஸன்மார்கு³ம் பா⁴ஷாப⁴க்திர் ப⁴ஜன் கெரேதி
வடபத்ர ஸாயி ஜொவள் வடஸே வடஸே